Ned 
 

Na estado. Kiko awor?

 

Si e tèst di embaraso ta positif, bo ta na estado. Kiko awor?

 

Kita òf keda ku e barika?

Na estado sin ke

Aborto

Mayor tiner

 

 

Kita òf keda ku e barika?

 

Tin dos opshon: bo por keda ku e barika i haña bo yu òf terminá e embaraso. Kisas bo ta hopi kontentu ku bo ta na estado. Den e kaso ei tuma kontakto ku bo dòkter di kas òf un partera pa guia bo den bo embaraso. Gosa di e nuebe lunanan bo dilanti.

 

Bo no ke un yu? E ora ei tin dos opshon:

  • bo por keda ku e barika i haña e yu.
  • bo por terminá e embaraso.

Kisas bo no sa ainda kiko hasi. Papia ku bo famia i amigunan. Kua desishon ku bo tuma, tuma tempu pa pensa bon. Bo desishon por tin konsekuenshanan hopi grandi.

 

 

Na estado sin ke


Bo a sali na estado sin bo tabata ke? Bo tin un desishon ferfelu bo dilanti. Bo tin kuater opshon:

  1. Keda ku e barika, haña e yu i kria bo yu bo mes.
  2. Terminá e embaraso ku un aborto.
  3. Keda ku e barika, haña e yu i laga hende adoptá bo yu.
  4. Keda ku e barika, haña e yu i laga un hende kri’é temporalmente.

Kua desishon ku bo tuma, bo mester pensa hopi bon. Un aborto por ta un desishon hopi pisa, pero bira mama tiner ta trese hopi responsabilidat i preokupashon. Tin hopi hende ku por yuda bo ku e desishon aki.

  • Papia ku un hende ku bo ta konfia i ku por konsehá bo. Manera bo mama òf un dosente.
  • Konta bo mayornan di bo embaraso. Si bo ta haña esaki difísil, bo por pidi yudansa di por ehèmpel un dosente òf bo dòkter di kas.
  • Bai bo dòkter di kas. Bo por diskutí tur posibilidat kuné. Podisé bo ta na tempu ainda pa terminá e embaraso.

Aborto


Si bo sali na estado sin tabata ke, bo por skohe pa terminá e embaraso. Esaki por ta un desishon hopi pisa. Bo mester pensa bon.

 

Si bo skohe pa aborto, bo ta kuminsá ku un kombersashon promé tokante bo desishon. Despues bo ta haña sinku dia pa pensa si bèrdat bo ke. Kon e aborto ta tuma lugá ta dependé di kon leu bo ta den bo embaraso. Despues ku nan a hasi e aborto bo ta bin bek pa un chèk.

 

Ta hopi difísil skohe entre un aborto òf keda ku e barika? Papia ku hendenan di konfiansa òf buska yudansa serka bo dòkter di kas. Asina bo por pone tur opshon banda di otro pa tuma un bon desishon.

 

 

Mayor tiner


Bira mama òf tata tiner por ta hopi dushi, pero ta trese hopi responsabilidat i preokupashon. Lo tin hopi momentu ku lo bo mester di sosten i lo sinti falta di bo libertat. Ken ta wak bo yu por ehèmpel ora bo ke sali un biaha anochi?

 

Un yu por tin konsekuensha pa bo relashon tambe. Bosnan plannan pa futuro por kambia drástikamente. Kon bosnan ta bai solushoná esei. Kon un yu chikí ta kuadra eiden?
Tambe mester disidí si bosnan tur dos ke ta metí den edukashon di e yu komo mama i tata. Kua papel abo ke?

 

Sòru pa i kuida un yu sa hasi hende insigur. Hopi mama ta insigur. Si bo tin pregunta bo por bai bo dòkter di kas òf FIOM.

  • Sigui lesa aki tokante bibienda, finansiá, edukashon i trabou pa mayornan tiner òf hóben.
  • Wak e eksperensianan di Melisia, Gino & Sherlon komo mama i tata tiner.

 

 
 
?>